Всего обработано новостей: 156947
Обработано новостей за 72 часа: 367

Мишаринъяс

Парма Гор 10.07.2019 19:08

Мишаринъяс 
Кулöмдiнын тайö семьяыс нималö спорт дорö муслунöн. Ачыс кöзяиныс, Иван Георгиевич Мишарин, помалiс Удмуртияын педагогическöй институт, босьтiс спортын уджалысьлысь специальносьт да 1971-öд воын локтiс чужан сиктас. Со öнöдз пуктö вын спорт сöвмöдöмö. Уджалiс Кулöмдiнса шöр школаын, тренерöн «Урожай» спорт котыр бердын челядьлöн да томуловлöн спорт школаын, öти кадö вель дыр веськöдлiс сiйöн. Сэсся туйдiс-велöдiс лызьöн котралысьясöс, Кебанъёльса ГПТУ-ын велöдчысьясöс, веськöдлiс районса администрациялöн физическöй культура, спорт да туризм юкöнöн да с.в. Арлыд вылö видзöдтöг, пыр котöртö-тэрмасьö радейтана удж вылö. Спортыс сiйöс сöвмöдö и томмöдö: таво тырис 70 арöс, но та мындасö некод оз сет. Волö районын котыртлöм быд ордйысьöм вылö, петö буръяс лыдö. И оз сöмын лызьöн котралöмын да кроссын. Сiйö бура ворсö и шахматöн. Институтас велöдчигöн на спартакиадаяс вылын вермылiс мукöд ворсысьясöс. Казьтылö, öтчыд пö вöлi спартакиада 22 сикас вермасьöмын, сiйö петкöдчис дас кöкъямысын. Мöдысь усис шуд ворсны чех да сöветскöй шахматист, международнöй гроссмейстер Саломон Михайлович Флоркöд. Комын ворсысьысь колисны куимöн, на лыдын Иван Мишарин. 
Иван Георгиевич быдтiс уна спортсменöс да тренерöс. Таво Кулöмдiнса спорт школа (ДЮСШ) кутас пасйыны 45 во тырöм. И.Г.Мишаринлы эм мый висьтавны сылöн сöвмöм йылысь. Быдтасъяссьыс сöмын лызьöн котралöмын спортса нёль мастер, медводдза разрядаыс – 100 сайö. Эмöсь Россияса, СССР-са, Коми республикаса, районса чемпионъяс да призёръяс. Кужö кыскыны спортö том йöзöс, тренировкаяс вылын весиг нуöдлö ворсöмъяс. Вермöмъяссö шедöдö аслас уджöн, корсьысьöмъясöн, выльторъяс пыртöмöн. Уна во спорт сöвмöдöмысь донъялiсны почёт грамотаясöн да дипломъясöн тшöтш тöдöмлунъяслöн, спортлöн министерствояссянь, сетiсны физкультураын да спортын ветеран, Коми Республикаса физическöй культуралöн, спортлöн да туризмлöн ветеран пасъяс, Россия Федерацияса физкультуралöн да спортлöн госкомитетлысь медаль да с.в. 2008-öд воын Иван Георгиевич лоис Кулöмдiнын медводдза пыдди пуктана олысьöн. 
Валентина Ивановна гöтырыс профессия сертиыс бухгалтер-экономист, но спортад пырöма юрвывтырыс жö. Важысянь уджалiс ДЮКФП-ын, öти кадö вöлi директорöн. 1985-öд воын сылöн водзмöстчöмöн котыртчылiс «Надежда» клуб, кытчö волывлiсны весиг челядьыскöд семьяясöн. Ме пыравлi жö тайö клубас да татшöм ногöн шойччöмыс воис сьöлöм вылö. Котралiм, петалiм лызьöн, вöлiны быд сикас спорт ворсöмъяс, конкурсъяс, ордйысьöмъяс, шылад улын вöчим ритмическöй гимнастика. Чукöрмылiм унаöн да юксьылiм кык пельö: öтияс кольччылiсны залö, мöдъяс песiсны асьнысö ывла вылын. 1989-öд воын клуб лоис республикаса конкурсын медводдзаöн, во-мöд мысти воис СССР-са спорткомитетсянь пыдди пуктан грамота. 
Бать-мамсяньыс спортöн «висьмисны» мукöдыс. Елена, Иван Георгиевичлöн чойыс, педучилище бöрын уджыштiс воспитательöн. Но челядь дырсянь спортын бергалöмыс сылы индiс мöд туй. Помалiс Коми пединститут да 1991-öд восянь дзикöдз вуджис спорт юкöнö. Мишаринъяслöн Екатерина нылыс пединститут бöрын вöлi волейболöн ворсысьяслöн тренерöн, öкмыс во веськöдлiс челядьлöн да том йöзлöн спорт школаöн. Мöд нылыс, Татьяна, Кулöмдiнын вöлi нывбаба-волейболистъяс пöвстын медбур ворсысьöн. Öнi олö юркарын, дасьтö ыджыд ордйысьöмъяс вылö волейбо-листъяслысь котыръяс. Том быдтасныс, Мишаринъяслöн внукыс, мунö налöн кок туйöд жö. Велöдчö Сыктывкарса университетын спорт факультет вылын, ветлö республикаса да Россияса ордйысьöмъяс вылö, шедöдiс лызьöн котралöмын спортса мастерö кандидатлысь ним. 
Мишаринъяслöн семьялы спорт — радейтана профессия, шойччöм да дзоньвидза олöм. Найö öтув ветлöны походö подöн и велосипедöн, ислалöны лызьöн, пырöдчöны Кулöмдiнын да районын котыртлöм ордйысьöмъясö. Носимын восьтiсны лызьöн да «ватрушкаясöн» исласянiн. «Носимса Альпы» лоис челядьлы и гырысьяслы бур шойччанiнöн. 
Нина Буткина. 
Валентина Мишариналöн снимок вылын: И.Г.Мишаринлöн кубок вылö ордйысьöм бöрын.

16