Би пыр и ва пыр

1986-öд воын апрель 26-öд лунö Чернобыльын лоис ыджыд неминуча — пасьмунiс атомнöй электростанцияын нёльöд блок.

— Гортö локтi удж бöрын, гöтыр бöрдö, тiра-лана киöн нюжöдö повестка Чернобыльын артмöм неминуча бырöдны мöдöдöм кузя. Мöд луннас и ковмис лэччыны Кулöмдiнö, сэки жö нуисны Княжпогостöдз, а сэсся Златоуст карö. Водзö лэбим Челябинскöдз, а сэсянь нин ыджыд машинаясöн Киев обласьтöдз. Овмöдiсны Чернобыльсянь 30 километра сайын, — панiс сёрнисö Зимстанысь Виталий Николаевич Зелёный.

Виталий Николаевичöс Чернобыльö нуисны 1987-öд вося апрельын. Овмöдiсны комын морт вылö арталöм палаткаö. Веськалiс квайт морта котыркöд, ставныс ас районсаяс. Ыстiсны весавны буретш пасьмунöмкöд орчча коймöд труба дортi.

Медводз ставныслы сеталiсны дозиметръяс. Сiйö ручка кодь, петкöдлiс быдöнлысь вир-яйын радиация. Уджавны нулiсны туйяс кытшлалöмöн, сы вöсна, мый веркöсыс лёк сорасъяса да ляксис машина кöлесаясö. Места вылöдз катöдлiсны лифтöн 60 метра судтаö. Сэнi вежлiсны став кöлуйсö. Зырйöн мешöкъясö сöвтiсны взрывöн шыбитöм кулак ыджда графит. Уджавны позис сöмын 30 секунд. Сэсся лэччылiсны бöр, мыссисны да пасьтавлiсны выль паськöм. Реакторлöн труба дорын мöдысьсö весасигöн вунöдчисны кадысь. Ёртыс шмонитiс, вайöй пö кырымасям труба вылас Рейхстагын моз, мед тöдiсны миянöс. Дерт, тайöс эз вöчны, но радио пыр найöс корöм эз кывны, сорасъяскöд уджалöмыс лоис дырджык. Та вöсна айловъясöс дугöдiсны сэтчö кайлöмысь. Водзö радиацияа сорасъяс весалiсны улыс площадка вылын нин. Ставнас Чернобыльын колис 48 лун.

Чернобыльса атомнöй электростанцияын радиация бырöдiгöн дзоньвидзалунсö воштöмысь вичмöдiсны «За заслуги перед Отечеством» да «Участник Чернобыля» юбилейнöй медальяс.

Би пыр да ва пыр мунöм айлов и талун кыпалö быд уджö. Виталий Николаевич Зимстанын олысь Чернобыльö ветлысьяс вöсна кывкутысь. Корлöны посёлокса олысьяскöд да челядькöд сёрнитны. Со и таво чукöстiсны библиотекаö.

Чужанiнö бергöдчöм бöрас ёртасис ылi муын öтлаын веськавлöм ёртъясыскöд.

— Квайт мортысь талун коли сöмын öтнам. Тшöкыда казьтыла Кулöмдiнысь Владимир Китаевöс да Владимир Шаховöс, Виталий Липинöс, Иван Холоповöс да Донысь Леонид Тимушевöс, — висьталiс В.Н.Зелёный.
Татьяна Чувьюрова.
Снимок Виталий Зелёныйлöн.